'ಸಂ'ಶೋಧನೆ

ತೂಕವಿಲ್ಲದ ರೀಸರ್ಚ್ ಪೇಪರ್ ಗಳು,
ಕುಲಗೆಟ್ಟ ರೀಸರ್ಚೆರ್ಸ್ ಗಳು,
ಬೇರೆ ರಿಸರ್ಚ್ ಪೇಪರ್ ಗಳ
ಹುಡುಕುವ ಕಳ್ಳ ಕಣ್ಣುಗಳು...

ಅಲ್ಲಿಂದ ಸ್ವಲ್ಪ-ಇಲ್ಲಿಂದ ಸ್ವಲ್ಪ
ಕದ್ದು  ಜೋಡಿಸಿ
ಹೊಸ  ರೂಪ
ಕೊಡುವ  ಕಲೆಗಾರರು ಇವರು
ಯಾರದೋ ಮಗುವಿಗೆ ತಂದೆಯಾದಂತೆ 

ಯಾರದೋ  ಸಂ'ಶೋಧನೆಗೆ  ಇವರು  ಜನಕರು...!

KAVI-‘THE’-SIS

(KAVI(THE)SIS)

ಕವಿತೆ ಎಂದರೆ

ಕಟ್-ಕಾಪಿ-ಪೇಸ್ಟ್ 

ಮಾಡಿದ ಥೀಸಿಸ್ಸೋ  

ಅಥವಾ ರಿಪೋರ್ಟೋ ಅಲ್ಲ.

ಅನುಭವ-ವಾಸ್ತವಗಳ ಹೂರಣದುಂಬಿ,

ಕನಸು-ಕಲ್ಪನೆಗಳ ಕಣಕಕ್ಕೆ.  

ಪ್ರೀತಿ-ಸ್ನೇಹದಿ ಲಟ್ಟಿಸಿ

ಒಲವಿನ ಒರತೆಯಲಿ 

ಹದವಾಗಿ ಬೇಯಿಸಿದ ಹೋಳಿಗೆಯದು! 

ತಂತಿ ಹರಿದ ವೀಣೆ

ಅವಳು ವೀಣಾ

ನಾನೇ ವೈಣಿಕ

ಅವಳ ಧ್ವನಿ

ತಂತಿ ಹರಿದ ವೀಣೆ..!

ಕನ್ನಡ-ಕನ್ನಡಿ

ಕನ್ನಡ ನಮ್ಮ

ಬದುಕಿನ ಕನ್ನಡಿ

ಇಂಗ್ಲೀಷ್ ಬಿಸಿಲಿಗೆ

ಧರಿಸುವ ಬಣ್ಣದ

ಕೂಲಿಂಗ್ ಗ್ಲಾಸ್....!

ಅವಳೊಂದು ದೊಡ್ದಮರ

ಅಮ್ಮ ಹೇಳುತ್ತಿದ್ದಳು
ನಾ ಚಿಕ್ಕವನಾಗಿದ್ದಾಗ
ಮರಕ್ಕಿಂತ ಮರ
ದೊಡ್ಡದು ಎಂದು….

ನಾನಾಗ ಚಿಕ್ಕವ
ನನಗಾಗ ತಿಳಿದಿರಲಿಲ್ಲ
ಅವಳ ಮಾತಿನ ಅರ್ಥ….

ನನಗೀಗ ತಿಳಿಯುತ್ತಿದೆ
ಅವಳ ಮಾತಿನ ಬೃಹದರ್ಥ
ಅವಳ ಕಷ್ಟದ ಮುಂದೆ
ನಾನೊಂದು ಸಣ್ಣಗಿಡ
ಅವಳೊಂದು ದೊಡ್ದಮರ…!

ಬವಣೆ

ನನ್ನಯ ಮನದಲಿ 

ನಿನಗಿದೆ ಮನ್ನಣೆ

ನೀನಿಲ್ಲದೆ ನನಗೆ

ಬರಿಯ ಬವಣೆ...!

 

ಬೆಳದಿಂಗಳ ರಾತ್ರಿ

ಬೆಳದಿಂಗಳ ರಾತ್ರಿಯಲಿ  

ಕಡಲ ತಡಿಯಲಿ 

ನಾವೀರ್ವರೆ ಕುಳಿತಿರಲು

ಮರಳ ಸಕ್ಕರೆಯ ಮೇಲೆ

 

ಬೀದಿಗೆ ಚಂದ್ರಮನು ಚೆಂಡಿನಂತೆ

ಅಲೆಯ ಮೇಲೆ ತೇಲಿಬರಲು

ನಾವಿಬ್ಬರು ನೀರಲಿ ತೊಯ್ದು 

ಚೆಂಡ ಹಿಡಿವ ಮಕ್ಕಳಂತೆ

 

ಯಾರೋ ಮೆಲುದನಿಯಲಿ ಉಸಿರಿದಂತೆ

ತಂಗಾಳಿಯು ತೇಲಿಬರಲು 

ಹೃದಯ ಮಾಡಿತು ಕೊಳಲದನಿ

ನೀ ನನ್ನೆದೆಯ ಒರಗಿದಾಗ...!

ಮುಂಗಾರು ಮಳೆ

ಈ ಮಳೆ.....

ಮಕ್ಕಳಿಗೆ
ತುಂತುರು ಮಳೆ

ಮುದುಕರಿಗೆ
ಮುದುಡುವ ವೇಳೆ

ಪ್ರೇಮಿಗಳಿಗೆ
ಮುಂಗಾರು ಮಳೆ

ವಿರಹಿಗಳಿಗೆ
ಮುಳ್ಳಿನ ಮೆಳೆ...!

ಜೀವನ ಪಯಣ

ಅವಳು

ಅವಳ ಹಿಂದೆ ನಾನು,

ಇವಳು

ನನ್ನ ಹಿಂದೆ ಬೇರೊಬ್ಬಳು,

ನಮ್ಮ ಜೀವನ ಪಯಣ

ಬೇರೆ ಬೇರೆ ದೋಣಿಯಲ್ಲಿ....!

ಅದೃಷ್ಟ ರೇಖೆ

ಅಂಗೈಯ ಹಿಡಿದು 

ಕೈ ರೇಖೆಗಳ ಸವರುತ್ತಾ

ರೇಖೆಯೊಂದ  ತೋರಿಸಿ,  
ನಾನೇ  ಆ  ಅದೃಷ್ಟ  ರೇಖೆ ಎಂದಳು...!